पुणे : ‘दि विश्वेश्वर सहकारी बँकेने सभासदांना दहा टक्के लाभांश दिला असून, तो सर्व सभासदांच्या खात्यात जमादेखील करण्यात आला आहे’, अशी माहिती बँकेचे अध्यक्ष अनिल गाडवे यांनी दिली. बँकेची ४८ वी वार्षिक सर्वसाधारण सभा नुकतीच पार पडली. या वेळी बँकेकडून सभासदांना दहा टक्के लाभांश जाहीर करण्यात आला. बँकेचे नवीन मुख्य कार्यकारी अधिकारी श्रीराम आपटे, ज्येष्ठ संचालक सुनील रुकारी, सभासद व बँकिंग तज्ज्ञ विद्याधर अनास्कर, उपाध्यक्ष मनोज साखरे आदी या वेळी उपस्थित होते.
‘मार्च २०१९ अखेर बँकेच्या ठेवी १५२३ कोटी रुपयांच्या असून, बँकेने ८५७ कोटी रुपयांची कर्जे दिली आहेत. या संपूर्ण वर्षांत बँकेचा एकूण व्यवसाय २३८० कोटी रुपयांचा झाला असून, बँकेला २९.०७ कोटी रुपये नफा झाला आहे,’ अशी माहितीही गाडवे यांनी दिली.
या वेळी बोलताना श्रीराम आपटे म्हणाले, ‘चालू आर्थिक वर्षात गतवर्षीच्या तुलनेत अधिक चांगली व्यवसाय वाढ व सर्वोत्तम वसुली करण्याचा आम्ही संकल्प केला आहे. बँकेने सिंहगड रस्ता शाखेत कॅश स्वीकारून एटीएमसारखे पेमेंट करणारे रिसायकलर मशीन ग्राहकांच्या सेवेत दाखल केले आहे’.
